X
egov

You are here

Ақтауда Қазақстан Республикасы Еңбек және халықты әлеуметтік қорғау министрлігінің Маңғыстау облысындағы күндері қорытындыланды

Ақтау кеңес

Қазақстан Республикасы Еңбек және халықты әлеуметтік қорғау вице-министрі Светлана Жақыпова жұмыс сапарымен Маңғыстау облысында болды және өңірде өткен ҚР Еңбек және халықты әлеуметтік қорғау министрлігінің күндерін қорытындылады.

Еске сала кетсек, 11-15 тамызда Министрлік қызметкерлері Маңғыстау облысының Түпқараған, Мұнайлы аудандарында, Жаңаөзен, Ақтау қалаларында болып, аталған елдімекендерде әлеуметтік-еңбек саласының өзекті мәселелері бойынша халыққа түсіндіру жұмыстарын жүргізді.

Жұмыс сапары кезінде Светлана Жақыпова мен облыс әкімінің орынбасары Шолпан Илмұханбетова Ақтау теңіз портының жұмысымен танысты және еңбек ұжымымен, соның ішінде "Жаңа серпін" өңірлік бағдарламасының қатысушыларымен кездесті. Маңғыстау облысының еңбек нарығында шиеленісті азайту жөніндегі өңірлік іс-шаралар жоспары - "Жаңа серпін" бағдарламасының мақсаты өңірлік еңбек нарығын трансформациялау, жұмыспен қамту шараларының тиімділігін арттыру, экономикалық өсу орталықтарына шоғырландыру арқылы жұмыс күші артық өңірлерден еңбек ұтқырлығын арттыруға ықпал ету болып табылады. 

Вице-министрдің сөзінше, Үкіметтің қолданыстағы бағдарламалары жұмыспен қамту және әлеуметтік қолдау мәселелерін тиімді шешуге мүмкіндік береді.

«Нәтижелі жұмыспен қамту бағдарламасының және атаулы әлеуметтік көмектің жаңа сипатының міндеті - өмірлік қиын жағдайда қалған қазақстандықтар үшін кедейліктен шығу жолын қалыптастыру. Біздің тарапымыздан халыққа түсіндіру жұмыстарын жүргізу қажет етіледі және біз оны өңірлерде Министрлік күндері тәрізді іс-шаралар шеңберінде жүзеге асырудамыз. Мемлекет ұсынатын мүмкіндіктерді зерделеуде халықтың өз белсенділігіне сенеміз. Маңғыстау облысы түсіндіру жұмыстарын жүргізуде аса маңызды өңірлердің бірі,                 аймақтан үкіметтік бағдарламаларға халықтың көп бөлігін тартуды жөн санаймыз», - байыптады вице-министр.

Жұмыс берушілермен өткен мәжілісте бала туудың жоғары көрсеткіштері, халықтың көші-қонының артуы, тұтастай алғанда облыстағы еңбек нарығының ахуалына айтарлықтай ықпал ететіндігі атап өтілді. Өңір - республика бойынша 2-ші орында тұрған ең жас өңірлердің бірі. Облыс тұрғындарының орташа жас мөлшері - 27,6 жас.

Облыста экономикалық белсенді халықтың тұрақты өсу үрдісі сақталуда, олардың саны 2015 жылдың басында 261,8 мың адамды құраса, 2017 жылдың 1 тоқсанында 280,1 мың адамға жетті немесе 18,3 мың адамға артты (өсім 107%). Жұмыспен қамтылған халықтың саны 17,7 мың адамға өсті. Өңірдегі жұмыспен қамтылудың құрылымы бойынша өз бетінше жұмыспен қамтылғандарға қарағанда жалдамалы еңбекпен қамтылғандар саны артық. Жұмыссыздық деңгейі төмендеген, 2015 жылғы 5,1%-дан 2017 жылғы 1 тоқсанда 4,9%-ға дейін, жастар жұмыссыздығының деңгейі 2015 жылғы 5,6 %-дан 2017 жылғы 1 тоқсанда 4,2%-ға дейін.

2015 жылы барлық жұмыспен қамтылғандар қатарынан 4394 адам тұрақты жұмысқа орналастырылды немесе 43,1%, 2016 жылы - 7406 адам немесе 53,6%. Бұл жұмыспен қамту шараларының тиімділігін көрсетеді. 2017 жылғы 1 тамыздағы жағдай бойынша тұрақты жұмыс орындарына 3986 адам орналастырылды немесе 69%.

Халық арасында өңірдің жұмыспен қамту органдарына сенімі артуда: 2015 жылғы кезеңде өңірлік жұмыспен қамту орталықтарына 60,5 мың адам хабарласса, 2013-2014 жылдарғы кезеңде тек 28,5 мың адам жүгінген.

Сапар барысында Светлана Жақыпова Кәсіпкерлерге қызмет көрсету орталығының және Ақтау қаласының жұмыспен қамту орталығының жұмысын көрді. Вице-министр өңірлік кәсіпкерлер палатасының, "Ауыл шаруашылығын қаржылай қолдау қоры" шағын қаржылық ұйымының басшылығымен, Нәтижелі жұмыспен қамту бағдарламасының қатысушыларымен өткен кездесуден соң Арнаулы әлеуметтік қызметтер орталығына барды. Сондай-ақ Еңбек және халықты әлеуметтік қорғау вице-министріне мүгедек әйелдерге арналған тігін цехының жұмысы таныстырылды.

Аймақ активімен өткен мәжілісте облыс әкімінің орынбасары Шолпан Илмуханбетова Маңғыстау облысының әкімдігі тарапынан мемлекеттік бағдарламалардың барлық бағыты белсенді іске асырылып жатқандығын, "Атамекен" ӨКП-мен бірлесіп жұмыс берушілердің, шағын және орта бизнес субъектілері күшінің жұмылдырылғанын, кәсіпкерлікті дамыту  бағытында бюджет қаржысының айтарлықтай бөлігі жұмсалып жатқандығын, сонымен қатар қосымша шаралардың да қолға алынып жатқандығын келтірді.

2017 жылғы 26-27 мамырда Маңғыстау облысында қоныстандыру өңірлері - Солтүстік Қазақстан, Павлодар, Шығыс Қазақстан облыстары өкілдерінің қатысуымен Ерікті қоныс аудару форумы өтті. Форум аясында Ақтау, Жаңаөзен қалаларында және Мұнайлы ауданында халықпен кездесулер мен бос жұмыс орындарының жәрмеңкелері ұйымдастырылды. Оларда әлеуетті қоныс аударушыларға 3500 мыңнан астам бос жұмыс орындары ұсынылды. Форумның қорытындысы бойынша 169 отбасы қоныстандыру өңірлеріне көшуге ниет білдірді.

Биыл Ерікті қоныс аудару бағдарламасы шеңберінде Үкімет айқындаған өңірлерге  13 отбасы көшті (4 отбасы/17 адам  – Павлодар, 2 отбасы/10 адам –  Қостанай,  6 отбасы/26 адам – Шығыс Қазақстан және 1 отбасы/4 адам – Солтүстік Қазақстан облыстары).

22 тамыз, 2017 - 12:36 өзгертілді
ҚР тәуелсіздік жылдарындағы жетістіктері
«ӨРЛЕУ» жобасы
Қазақстанда іске асырылып жатқан үздік әлеуметтік жобалар
«Еңбек жолы» Республикалық конкурсы
Әлеуметтік қызмет көрсету жүйесін одан әрі жаңғырту тұжырымдамасы
Еңбек дағдыларын дамыту және жұмыс орындарын ынталаңдыру
Жаңа ұлттық қызметтер жіктеуіші